أتذكر و انا طفل صغير اني كسبت من مجلة ماجد الاماراتية عشرة درهم و بعتوهوملي في جواب .. بعدها باسبوعين كنت كسبت في مجلة سمير كورة قدم هيسلمهالي استاذ ابراهيم نصر و كان ساعتها مشهور جدا ببرنامج الكاميرا الخفية .. المهم والدي رحمة الله عليه مرضيش يوديني و كان التكريم يوم جمعة مع انه وداني قبلها كذا مرة .. يوم الخميس بالليل قررت شيء خطير جدا .. رهيب يعني .. اني هروح لوحدي .. اه و الله .. صحيت صليت الفجر و كان عندي ١١ سنة .. و لبست و نزلت .. ركبت عربية اجرة من البيت لمحطة القطر .. كان معايا ٣ جنيه و العشر دراهم .. كنت خايف جدا .. قطعت التذكرة .. فاكر اني كنت واقف ع الباب برتعش .. و القطر بيتحرك فكرت بعنف اني انط و ارجع البيت .. لكن منطتش .. اتذكر اني دمعت و القطر ماشي .. القطر كان فاضي .. قعدت و طلعت قصة لرجل المستحيل و قعدت اقرأ .. كل ما حد يعدي يقولي فين ابوك .. اسكت و ابتسم .. من حسن حظي قعد قصادي ست طيبة جدا .. و معاها بنت و ولد .. سالتني باهتمام فقولتلها اللي حصل .. الست اترعبت .. و قالتلي ازاي تعمل كده .. ابتسمت و سكت .. فضلت طول الطريق تضحك معايا و جابتلي حاجة ساقعة و عسلية .. اه و الله .. انا فاكر ملامحها كانه امبارح .. في الاخر نزلت قبل القاهرة بشوية و حضنتني و قالتلي انت مش طبيعي بس انا حبيتك ، خد بالك من نفسك و متتاخرش و ترجع بالف سلامة .. وصلت كانت الساعة ١٠ صباحا تقريبا .. نزلت محطة مصر مع الناس و العجيب اني كنت سعيد .. جدا .. و خوفي انتهي و حلت محله سعادة عجيبة .. طلعت من المحطة ، دورت علي تليفون .. كلمت جارنا الحاج زكريا خالد معلم الاجيال و كنت و مازلت بحبه جدا جدا .. مرضيتش اكلم ابويا عشان هيقولي خليك مكانك انا جايلك او ارجع حالا .. الحاج زكريا مصدقش ودنه و انا بقوله .. و قالي ازاي يا ابني تعمل كده .. قولتله طمن والدي يا حاج و متقلقش عليا ، انا جدع جدا و هجيب الكورة و اسلم علي الاستاذ ابراهيم و هرجع علي خير باذن الله .. و قبل ما يقول حاجة قفلت السكة .. ابويا مرة من كام شهر كان خدني محل صرافة في رمسيس غير منه ريالات سعودية .. رحت المحل ، كان فاتح .. و ده كان خوفي الرهيب .. النقطة دي .. اني لاي سبب معرفش اغير العشر دراهم .. كده لا هعرف اروح دار الهلال و لا هعرف ارجع .. قلبي كان بينتفض و الله من شدة سرعة ضرباته .. الراجل بصلي و قالي جبتها منين دي .. قولتله كسبتها من مجلة ماجد .. كان فيه راجل جنبه قالي دي تعمل ٨ جنيه و نص .. قولتله لأ .. انا عارف انها تعمل تسعة جنيه و عشرين قرش .. قالي خلاص مش عاوزين خدها و امشي .. قولتله ماشي .. الراجل الكبير ضحك و قالي انت منين .. من البحيرة .. فين والدك .. جيت لوحدي .. ليه يا ابني .. حكيتله .. الراجل اندهش بدرجة كبيرة و قاله اديله عشرة جنيه مقفولة .. مرضيتش ابدا .. قالي انا زي والدك .. برضه مرضيتش .. ادالي ٩ جنيه و ٢٠ قرش .. عمري ما انسي .. بس قالي هو الحفلة امتي .. قولتله الساعة ٢ بعد صلاة الجمعة .. قالي طب اقعد .. هتفطر معايا ، و الله لتفطر معايا .. الحقيقة كنت جعان فقعدت .. بعت جابلي سندوتشات كبدة و حاجة ساقعة .. قعدت اكل و اتابع الشغل .. قعدت ساعة .. الراجل و انا ماشي قالي انا و الله يا ابني ما كسبت كده في يوم زي النهاردة ، انا بفكر اقفل و اروح ، انت وش خير ، تعالي اوصلك مكان ما انت رايح ، قولتله الف شكر انا عارف مكان دار الهلال و ركبت المترو مع ابويا قبل كده ٣ مرات .. وصلني لمحطة المترو .. كانت جنب المحل .. قطعت تذكرةلمحطة المبتديان ، و نزلت جنب دار الهلال ، صليت الجمعة في الشارع مع الناس و اتمشيت لدار الهلال ، قعدت علي الرخامة البيضة الجميلة في مدخل الدار النظيف و كانت ريحته حلوة فعلا ، قعدت اتفرج علي الناس في الشارع و كنت سعيد جدا .. بعد شوية فتحوا القاعة و جه شخص كنت بحبه جدا و عمري ما انساه اسمه الاستاذ محسن الزيات كبير الكتاب في مجلة سمير .. سلمت علي حضرته و جه باقي الناس و وصل الاستاذ ابراهيم نصر و كان لابس برنيطته الشهيرة .. كنت سعيد جدا .. قعد يتكلم عن الكاميرا الخفية و احنا نسأله و يجاوب و كان طيب و بشوش و دمه خفيف .. استلمت الكورة و مضالي عليها .. عملوا مسابقة معلومات عامة و انا كنت رهيب في الحاجات دي .. كسبت و اخدت مجموعة كتب جميلة منها روايات للاستاذ عبد الحميد جودة السحار منهم رواية لا انساها اسمها الحصاد .. كانوا جايبين جاتوهات و عصاير اكلت و شربت و انبسطت .. الحفلة خلصت و رجعت بالمترو علي محطة مصر .. كل ما كان حد يقولي فين اهلك اقولهم منتظريني في رمسيس .. مكنتش عاوز اعمل مشكلة للناس في الحفلة او أقلقهم عليا .. ما عدا استاذ محسن الزيات .. مكنش يعرفني كويس ، كنت كاتب سمير الصحفي الناشيء و معايا كارنيه و نشرلي كذا مقال ، و…..