சம வேலைக்கு சம ஊதியம்: ~~~~~~~~~~~ தொகுப்பூதிய -ஒப்பந்த செவிலியர் கோரிக்கைகளைத் தமிழ்நாடு அரசு நிறைவேற்ற முன்வர வேண்டும்! அரசுப் பணியாளர்களாக அவர்களை அங்கீகரிக்க 'கொள்கை முடிவு' வரையறுக்க வேண்டும்! ~~~~~~~~~~ அரசு மருத்துவமனைகளில் பணிபுரிந்து வரும் தொகுப்பூதியம் மற்றும் ஒப்பந்த அடிப்படையிலான செவிலியர்கள், தங்களுக்குப் பணி நிரந்தரம் வேண்டும் என்றும், 'சம வேலைக்கு சம ஊதியம்' வழங்க வேண்டும் என்றும் கோரி அவ்வப்போது போராட்டம் நடத்தி வருகின்றனர். அண்மையில் போராடிய செவிலியர்கள் சங்கத்தின் முன்னணி நிர்வாகிகளோடு நடத்திய பேச்சுவார்த்தையில் உடன்பாடு ஏற்பட்டு, அரசு கோரிக்கைகளை பரிசீலிப்பதாக உறுதியளித்த நிலையில் போராட்டம் தற்காலிகமாக கைவிடப்பட்டுள்ளது. அரசு மேற்கொண்டுள்ள இந்த முயற்சியை வரவேற்கிறோம். தொகுப்பூதியம் மற்றும் ஒப்பந்த அடிப்படையில் பணிபுரியும் செவிலியர்கள், 'சம வேலைக்கு சம ஊதியம்' வேண்டுமென்பது மிகவும் நியாயமான கோரிக்கையாகும். இதனை தமிழ்நாடு அரசு காலம் தாழ்த்தாமல் விரைந்து பரிசீலனை செய்து அதனை நிறைவேற்ற முன்வர வேண்டும். சுகாதாரத்துறையில் பணியாற்றும் செவிலியர்கள் மட்டுமல்லாது அரசின் பல்வேறு துறைளிலும் தொகுப்பூதியத்தில் பணியாற்றும் செவிலியர்கள் பணிநிரந்தர கோரிக்கை முன் வைக்கின்ற போதெல்லாம், அரசு தரப்பில் உயர்நீதிமன்றத் தீர்ப்புகளைச் சுட்டிக்காட்டி அதனை மறுதலித்து வருகிறது. வழக்கமான இத்தகைய போக்கினை கைவிட்டு மக்களின் நலம் பேணும் மகத்தான பணிகளைச் செய்யும் தற்காலிக -ஒப்பந்த செவிலியர்கள் அனைவரையும் பணி நிரந்தரம் செயவதற்கான 'கொள்கை முடிவை' உடனடியாக வரையறுத்திட வேண்டுமென தமிழ்நாடு அரசை விடுதலைச் சிறுத்தைகள் கட்சி வலியுறுத்துகிறது. இவண்: தொல்காப்பியன் திருமாவளவன் , நிறுவனர்-தலைவர், விசிக.

வெற்றிப்பயணத்திட்டத்தை மாற்றுத்திறனாளிகளுக்கும் விரிவுப்படுத்தியதற்கு நன்றி: இது சிறுத்தைகளின் சமூகநீதிக் கோரிக்கைக்குக் கிடைத்த வெற்றி! ———————————————— தமிழ்நாடு அரசு வெற்றி பயணத்திட்டத்தின் மூலம் கட்டணமில்லா பேருந்து சேவை தற்போது பெண்கள் மற்றும் திருநர்களுக்கு விரைவு (Express), குறைந்த நிறுத்தங்கள் கொண்ட சேவை (LSS), சொகுசு்(Deluxe) பேருந்துகளுக்கு நீட்டிக்கப்பட்டு இதனை முதலமைச்சர் மாண்புமிகு ஜோசப் விஜய் அவர்கள் துவக்கி வைத்துள்ளது பாராட்டுக்குரியது. பெண்கள், திருநர் போன்றே அரசின் சிறப்பு கவனம் தேவைப்படுகிற சமூகமான மாற்று திறனாளிகளுக்கும் இத்திட்டத்தை விரிவுபடுத்தப்பட வேண்டும் என்று கடந்த 09.09.2026 அன்று மாண்புமிகு முதலமைச்சர் திரு. ஜோசப் விஜய் அவர்களிடம் விடுதலைச் சிறுத்தைகளின் சார்பில் கோரிக்கைக் வைக்கப்பட்டது தற்போது தமிழ்நாடு அரசு இத்திட்டத்தை மாற்றுத் திறனாளிகளுக்கு விரிவுபடுத்தியுள்ளதாக சமூக நலத்துறை அமைச்சர் ஜெகதீஸ்வரி அறிவித்துள்ளதை விடுதலைச் சிறுத்தைகள் கட்சி சார்பில் வரவேற்று நன்றியினை தெரிவித்துக் கொள்கிறோம். இந்த அறிவிப்புனை உறுத்திப்படுத்தி நடைமுறைப்படுத்தும் வகையில் இதற்கான அரசாணையினை தமிழ்நாடு அரசு உடனடியாக வெளியிட வேண்டுமென விடுதலைச் சிறுத்தைகள் சார்பில் வலியுறுத்துகிறோம். இவண் தொல்காப்பியன் திருமாவளவன், நிறுவனர் - தலைவர், விடுதலைச் சிறுத்தைகள் கட்சி

கடலூர் சி.கந்தசாமி நாயுடு மகளிர் கல்லூரியில் நடைபெற்ற பட்டமளிப்பு விழாவில் பங்கேற்று மாணவர்களுக்கு பட்டங்களை வழங்கி ஆற்றிய உரை...

கர்நாடக முதல்வரின் தில்லிப் பயணம்: ____________________________ மேகதாது அணை கட்டும் முயற்சியை முறியடிக்க அனைத்துக்கட்சிக் கூட்டத்தைக் கூட்ட வேண்டும்! தமிழ்நாடு அரசுக்கு விசிக வேண்டுகோள்! ___________________________________ கர்நாடக முதல்வர் திரு. டி.கே. சிவகுமார் அவர்கள் நேற்றுஅண்மையில் (செப்டம்பர் 28) புதுடெல்லியில் ஒன்றிய அரசின் நீர்வளத்துறை அமைச்சர் சி.ஆர். பாட்டீலைச் சந்தித்துள்ளார். அப்போது மேகதாது உள்ளிட்ட கர்நாடகாவின் நீர்த்திட்டங்களுக்கு அனுமதி மற்றும் நிதியளிப்பது ஆகியவற்றை விரைவுப்படுத்த வேண்டுமென கோரியுள்ளார். குறிப்பாக, மேகதாது சமநிலை நீர்த்தேக்கம் மற்றும் குடிநீர்த் திட்டத்திற்குரிய புதிய விரிவான திட்ட அறிக்கையை (DPR) ஒப்படைத்து, அதன் இணக்க அறிக்கையின் மதிப்பீட்டை விரைவுப்படுத்தவும் வலியுறுத்தியுள்ளார். கர்நாடக முதலமைச்சரின் இந்த நடவடிக்கைகள், தமிழ்நாட்டின் நீர் உரிமைக்கு எதிராக மேகதாது அணையைக் கட்டி முடித்திட வேண்டும் என்கிற தீவிரத்தன்மையினை வெளிப்படுத்துகிறது. காவிரி நடுவர் மன்றத் தீர்ப்பு, உச்சநீதிமன்றத் தீர்ப்பு மற்றும் காவிரி நீர் மேலாண்மை ஆணையத்தின் உத்தரவுகள் ஆகியவற்றை புறந்தள்ளிவிட்டு, தமிழ்நாட்டிற்குக் கிடைக்க வேண்டிய காவிரி நீரை வழங்காமல் கர்நாடக ஆட்சியாளர்கள் காலம் காலமாய் வஞ்சிப்பது தொடர்கிறது. அத்துடன், ஒன்றியத்தில் ஆட்சி அதிகாரத்திலிருக்கும் எந்த ஒரு அரசாக இருந்தாலும் இதற்கான தீர்வைத் தேடாமல் இவற்றை வேடிக்கை பார்ப்பதிலும், தமிழ்நாட்டிற்கான உரிமையை நீர்த்துப்போகச் செய்வதிலும் கவனமாக செயல்பட்டு வருகிறது. இந்நிலையில், மேகதாது அணையைக் கட்டும்நிலை உருவானால் தமிழ்நாட்டின் எதிர்காலம் இருள் சூழ்ந்ததாக மாறும். நெல் உற்பத்தி வெகுவாகப் பாதிக்கப்படும். டெல்டா மண்டலம் பாலைவனமாகும். தமிழினத்தின் வாழ்வாதாரம் பாழகும். ஆகவே, கர்நாடக அரசின் இம்முயற்சிகளை முறியடிக்க வேண்டிய பொறுப்பு தமிழ்நாட்டு மக்களுக்கும் தமிழ்நாடு அரசுக்கும் உள்ளது. இத்தகைய சூழலில் தமிழ்நாடு அரசு உடனடியாக அனைத்துக் கட்சிக் கூட்டத்தைக் கூட்டி இது தொடர்பாக விவாதித்து மேகதாது அணை கட்டும் முயற்சியை முறியடிக்க வேண்டுமென விடுதலைச் சிறுத்தைகள் கட்சியின் சார்பில் வேண்டுகோள் விடுக்கிறோம். இவண்: தொல்.திருமாவளவன், நிறுவனர்-தலைவர், விடுதலைச் சிறுத்தைகள் கட்சி.

டெல்லியில் இன்று நடைபெற்ற இந்தியா கூட்டணிக் கட்சிகளின் கூட்டத்தில் விசிக சார்பில் உரையாற்றினேன். எனது உரையின் இறுதியில் பின்வரும் நடவடிக்கைகளை எடுக்குமாறு இந்தியா கூட்டணியைக் கேட்டுக்கொண்டேன். INDIA கூட்டணி பின்வரும் நடவடிக்கைகளை மேற்கொள்ளுமாறு கேட்டுக்கொள்கிறேன்: 1. குற்றஞ்சாட்டப்பட்ட சட்டவிரோத நடவடிக்கைகள் தொடர்பாக தலைமைத் தேர்தல் ஆணையர் ஞானேஷ் குமார் பதவி விலக வேண்டும் என்றும், அவர் கைது செய்யப்பட வேண்டும் என்றும் கோர வேண்டும். 2. தற்போது நடைபெற்று வரும் SIR நடவடிக்கையை உடனடியாக நிறுத்தக் கோர வேண்டும். 3. பெயர்கள் நீக்கப்பட்ட வாக்காளர்களின் சமூகவாரியான விவரங்களை வெளியிடக் கோர வேண்டும். 4. நீக்கப்பட்ட 13 கோடி வாக்காளர்களின் பெயர்களையும் மீண்டும் வாக்காளர் பட்டியலில் சேர்க்கக் கோர வேண்டும். 5. வாக்களிக்கும் உரிமையை அடிப்படை உரிமையாக்கக் கோர வேண்டும். 6. திரு. ஞானேஷ் குமாரை தலைமைத் தேர்தல் ஆணையராக நியமித்ததற்காக பிரதமரும் உள்துறை அமைச்சரும் மன்னிப்புக் கோர வேண்டும் எனக் கோர வேண்டும். 7. தலைமைத் தேர்தல் ஆணையர் மற்றும் இதர தேர்தல் ஆணையர்கள் சட்டம், 2023-ஐ திரும்பப் பெறக் கோர வேண்டும். 8. ஜனநாயகத்தைப் பாதுகாப்பதற்காக நாடு தழுவிய போராட்டத்தை அறிவிக்க வேண்டும். நன்றி. முனைவர் தொல்காப்பியன் திருமாவளவன், நிறுவனர் – தலைவர் விடுதலைச் சிறுத்தைகள் கட்சி இணைப்பு ஆங்கில உரையின் நகல்:

நெல்லை கவின் கொலைவழக்கில் குற்றம் சாற்றப்பட்ட சுர்ஜித்தின் (ஏ1) பெற்றோர் சரவணன்(ஏ2) கிருஷ்ணகுமாரி(ஏ3) ஆகியோர் மீதான 'குற்றச்சாற்று அறிக்கையை' மதுரை உயர்நீதிமன்றம் 'ரத்து' செய்திருப்பது அதிர்ச்சியளிக்கிறது. விசாரணைக்குப் பின்னர் ஆதாரங்கள் இல்லையென விடுதலை செய்வது தான் நீதிமன்றத்துக்குள்ள அதிகாரம். குற்றவிசாரணை தொடங்குவதற்கு முன்னரே குற்ற அறிக்கையை 'ரத்து' செய்வது 'தவறான முன்மாதிரி' ஆகும். கவின் கொலைவழக்கில் கைது செய்யப்பட்ட சரவணன் பிணையில் (ஜாமீனில்) வெளியே வந்ததும் இன்னொரு கொலைவழக்கில் கூலிப்படையினரோடு தொடர்பிருப்பதாக மீண்டும் கைது செய்யப்பட்டிருப்பவர் என்பது குறிப்பிடத் தக்கது. இத்தகைய பின்னணி கொண்ட ஒருவரையும் அவரது மனைவியையையும் குற்றமற்றவர்கள் என்கிற தோற்றத்தை உருவாக்கும் வகையில் உயர்நீதிமன்ற நடவடிக்கை அமைந்துள்ளது. இந்நிலையில், தமிழ்நாடு அரசு இதனை எதிர்த்து மேல்முறையீடு செய்திட ஆவன செய்ய வேண்டுமென விடுதலைச் சிறுத்தைகள் கட்சியின் சார்பில் வலியுறுத்துகிறோம்.

ஈகச்சுடர் திலீபன் சிலை அகற்றம்: ----------------------------------- சிங்கள இனவெறி ஆட்சியாளர்களின் உண்மை முகம் அம்பலமாகியுள்ளது! அதிபர் அனுர திசநாயக அரசின் ஆதிக்கவெறி போக்கை வன்மையாக்க் கண்டிக்கிறோம்! ------------------------------------------- ஈழமண்ணில் ஈகச்சுடர் திலீபனின் திருவுருவச் சிலையை சிங்கள -பௌத்த பேரினவாத ஆட்சியாளர்கள் இன்று (செப்டம்பர் 27) அகற்றியுள்ளனர். யாழ்ப்பாணம், நல்லூரில் சில நாள்களுக்கு முன்பு பொதுமக்களால் நிறுவப்பட்ட அச்சிலையை, தமது ஆதிக்கவெறியை வெளிப்படுத்தும் வகையில் சிங்களக் காவல்துறையினர் அப்புறப்படுத்தியுள்ளனர். அதிபர் அனுர திசநாயக அரசின் இந்த ஒடுக்குமுறை நடவடிக்கையை விடுதலைச் சிறுத்தைகள் கட்சியின் சார்பில் மிக வன்மையாகக் கண்டிக்கிறோம். 1987 ஆம் ஆண்டு செப்டர் 26 அன்று ஈகச்சுடர் திலீபனின் இன்னுயிர் மூச்சு அடங்கியது. இந்திய ஒன்றிய ஆட்சியாளர்களுக்கு சில கோரிக்கைகளை முன்வைத்து துளி வன்முறைக்கும் இடமின்றி அறவழியில் 12 நாட்கள் உண்ணாநிலையில் கடும் தவமிருந்த திலீபன், தனது மகத்தான ஈகத்தால் உலகின் கவனத்தை ஈர்த்தார். அவர் ஆயுதப் பயிற்சி பெற்ற ஒரு போராளியாயிருந்தும், வன்முறையில்லா அறவழியில் போராடும் துணிவையும் வலுவையும் கொண்டிருந்தார். அதன் மூலம் வெகுமக்களின் பேரன்பை வென்றெடுத்தார். மேதகு பிரபாகரன் அவர்களின் வணக்கத்திற்குரியவர் என்னும் பேறு பெற்றார். அத்தகைய மக்கள் போராளியை நன்றிப் பெருக்கோடு உலகெங்கும் தமிழ் மக்கள் கடந்த 39 ஆண்டுகளாக நினைவுகூர்ந்து வீரவணக்கம் செலுத்தி வருகின்றனர். அந்த வகையில் ஈழத்திலும் தமிழ்மக்கள் அவரது திருவுருவச் சிலையை நிறுவி அவருக்குத் தமது நன்றியை வெளிப்படுத்தியுள்ளனர். பொதுமக்களின் இந்த உணர்வைக் காயப்படுத்தும் வகையிலும் அவர்களை அச்சுறுத்தி ஒடுக்கும் வகையிலும் சிங்கள இனவெறி ஆட்சியாளர்கள் அவரது சிலையை அப்புறப்படுத்தியிருப்பது அவர்களின் உண்மை முகத்தை உலகுக்கு அம்பலப்படுத்தியுள்ளது. இவர்கள் இடதுசாரிகள், முற்போக்கானவர்கள் என்கிற தோற்றம் உண்மையல்ல என்பதை உலக மாந்தருக்கு உணர்த்தியுள்ளது. லெப். கேணல் திலீபனின் சிலையை அவர்கள் எம் மண்ணிலிருந்து அப்புறப்படுத்தியிருக்கலாம் ; ஆனால், அவரைத் எம் மக்களின் நெஞ்சத்திலிருந்து ஒருபோதும் அகற்றிவிட முடியாது! எமது திலீபன் கனவு ஒருநாள் நனவாகும் என்கிற நம்பிக்கையோடு உலகத் தமிழர்கள் யாம்ஒருங்கிணைந்து களமாடுவோம்! இவண்: தொல்காப்பியன் திருமாவளவன், நிறுவனர்-தலைவர், விசிக.