Ku wa Gatanu tariki 2 Ukwakira 2026, Minisitiri w'Ubuzima, Dr. Sabin Nsanzimana uri i Paris mu Bufaransa, yasuye ikigo cyita ku barwaye Kanseri cyitwa Gustave Roussy kiri mu bikomeye ku Isi. Minisitiri Nsanzimana yasinye amasezerano y’ubufatanye na Gustave Roussy International ndetse n’Ikigo cy’Ubuvuzi bwifashisha ‘radiologie’ (Institut de Radiologie Interventionnelle et de Médecine Interventionnelle: IRMI). Ni ubufatanye buzafasha mu guteza imbere serivisi zo kuvura no kwita ku barwayi ba kanseri, no kongera ubumenyi n’ubushobozi bw’u Rwanda mu bijyanye n’ikoreshwa rya 'radiologie'. #UmunotaNews

Ku wa Gatanu, Minisitiri w’Ingabo, Juvenal Marizamunda, yatangije ku mugaragaro amasomo ku banyeshuri batangiye kwiga  mu Ishuri Rikuru ry’Ubuvuzi  rya Gisirikare (Defence College of Health Sciences) rifite icyicaro mu Ishuri Rikuru rya Gisirikare i Gako. Gufungura iri shuri ni intambwe ikomeye mu gushimangira uburezi bwihariye mu buvuzi bwa gisirikare no guteza imbere ubumenyi n’ubunyamwuga bw’abakora mu rwego rw’ubuzima mu Ngabo z’u Rwanda. #UmunotaNews

Ku mugoroba wo kuri uyu wa Gatanu, Minisitiri wa Siporo Nelly Mukazayire ari kumwe na Perezida w’Agateganyo wa FERWAFA, Me Claudine Gasarabwe bakiriye abakinnyi b’Ikipe y'Igihugu Amavubi yageze mu Rwanda ivuye i Praia muri Cabo Verde. Amavubi yitwaye neza atsinda Cabo Verde ibitego 2–1 mu mukino ubanza mu gushaka itike y'Igikombe cya Afurika cya 2027. Kubera urugendo rugoye iki kipe yakoze mu kugaruka, Minisitiri Mukazayire yijeje abakinnyi ko bazajya bahabwa indege yihariye (charter flight) mu ngendo zayo. #UmunotaNews

IMPAMVU MUZI NI FDLR || AFC/M23 ISIGAJE KWITA IZINA IGIHUGU CYAYO | AMERIKA N'UBWIRINZI BW'U RWANDA Reba ikiganiro cyose hano: 👉 youtu.be/1SJ1UUuBPNM?si=g7mv… #UmunotaNews

AMAKURU 2.10.2026: SENATERI EVODE ATUNZE AGATOKI MTN || THE BEN NA DIAMOND I KAMPALA || MURI FERWAFA Video: youtu.be/TXOaQd0R8IY?si=GlvO…

Ikipe y'Igihugu y'u Rwanda 'Amavubi' yageze i Kigali ivuye i Praia muri Cape Verde aho yari yagiye gukina n'icyo gihugu umukino ubanza mu yo gushaka Itike y'Igikombe cya Afurika cya 2027, rwanatsinze ibitego 2-1. Amavubi azasubira mu kibuga ku wa Mbere, mu mukino wa gicuti azakiramo Ikipe y'Igihugu ya Kenya "Harambee Stars". #UmunotaNews

Minisitiri w’Intebe, Dr. Justin Nsengiyumva, yavuze ko ikibazo cy’izamuka ry’ibiciro ku masoko gihangayikishije leta ndetse ikomeje guhangana nacyo ariko ko kitazakemurwa hashingiwe ku marangamutima ahubwo gikwiye kurebwa mu ishusho ngari ahanini ku ingano y’umusaruro w’ibyo igihugu gifite. ▶️ Video: youtu.be/bZ-oyaaH9lY

Kuri uyu wa Gatanu, Perezida Kagame, yakiriye indahiro za Senateri Gasamagera Wellars na Depite Ben Niyonshuti binjiye mu Nteko Ishinga Amategeko y’u Rwanda. Amb. Gasamagera yatowe nk’Umusenateri uhagarariye Ihuriro ry’Igihugu Nyunguranabitekerezo ry’Imitwe ya Politiki asimbuye Donatille Mukabalisa witabye Imana. Ni mu gihe Ben Niyonshuti yatorewe guhagararira urubyiruko mu Mutwe w’Abadepite asimbuyeVenuste Icyitegetse weguye. #UmunotaNews

Ishyirahamwe ry’Umupira w’Amaguru mu Rwanda, FERWAFA, ryemeje ko amatora ya Perezida mushya azaba muri Mutarama 2027, nyuma y’ubwegure bwa Shema Ngoga Fabrice wari usanzwe ariyobora. FERWAFA kandi yemeje Me Gasarabwe Claudine nk’Umuyobozi w’Agateganyo, akaba ari we uzayobora iri shyirahamwe kugeza igihe amatora azabera. #UmunotaNews

“Abo ntabwo ari bo baduhangayikishije cyane.” Minisitiri w’Intebe Dr. Justin Nsengiyumva asubiza Depite Mukabunani Christine wamubajije niba hari icyo Leta iteganya gukora ku bakoraga inzoga zakuwe ku isoko bari barashoyemo imari harimo abari barafashe inguzanyo mu mabanki. Yagize ati “Dukwiye guhangayikishwa n’uko uyu muntu yafashe amafaranga muri banki cyangwa dukwiye guhangayikishwa n’uko hari umwana wabaye impfubyi cyangwa umudamu wabaye umupfakazi kubera ko umugabo yanyoye ziriye nzoga?” Minisitiri w'Intebe yavuze ko igihe nikigera, gukora izo nzoga bizakomeza ariko bigakorwa mu murongo mushya Leta izashyiraho utuma bakora ibyemewe n’amategeko. #UmunotaNews

Nyuma y'umunsi umwe gusa Ingabo za RPF Inkotanyi zitangiye urugamba rwo kubohora u Rwanda, Maj Gen Fred Gisa Rwigema yitabye Imana ku wa 2 Ukwakira 1990. Maj Gen Fred Gisa wari uyoboye urugamba yari amaze guha ibyerekezo ingabo muri batayo enye zitandukanye harimo ebyiri zerekezaga i Kigali. #UmunotaNews

The Ben na Diamond Platnumz bategerejwe i Kampala muri Uganda, aho bazitabira ibirori byihariye byiswe ‘Private Meet and Greet’, bizabahuza n'abakunzi babo. Ibi birori bizabera muri Kampala Marriott Hotel ku mugoroba wo ku wa 29 Ukwakira 2026, aho abazabyitabira bazagira umwanya wo guhura n’aba bahanzi, gufatana amafoto no gusangira ifunguro. #UmunotaNews

Umunyamakuru Migambi Gilbert, uzwi cyane nka Migambi Nyawe, yagizwe Umuyobozi mushya wa Isango Star, aho azaba ayoboye ibikorwa bya radiyo ndetse na televiziyo by’iki kigo. Migambi Nyawe afite uburambe mu itangazamakuru, kuko yakoze kuri Radio/TV1, mbere yo gukomereza kuri Magic FM, imwe muri radiyo z’Urwego rw’Igihugu rw’Itangazamakuru (RBA) ndetse na SK FM. #UmunotaNews

Kuri uyu wa Kane, Abaturage bo mu Karere ka Ngororero bashyikirijwe inzu 200 bubakiwe nyuma yo gusenyerwa n’ibiza byo mu 2023, binyuze mu mushinga CERC ushyirwa mu bikorwa na Minisiteri y’Ibikorwa by’Ubutabazi (MINEMA) ku bufatanye na Banki y’Isi. Minisitiri ushinzwe Ibikorwa by’Ubutabazi, Maj. Gen (Rtd) Albert Murasira yasabye abahawe izi nzu kuzifata neza, bagakomeza gushyira mu bikorwa ingamba zo gukumira no kugabanya ingaruka z’ibiza, cyane cyane muri ibi bihe hateganyijwe imvura nyinshi y’Umuhindo. Ni igikorwa kizakomeza, aho abasenyewe n’ibiza mu turere twa Ngororero, Muhanga, Rutsiro, Nyabihu, Karongi, Burera na Rubavu, bazashyikirizwa inzu nshya 3,059. Muri rusange, abaturage bagezweho n’ingaruka z’ibiza muri utu turere basaniwe ndetse bubakirwa inzu 5,096. #UmunotaNews

Umukino wa gicuti wahuzaga APR FC na Amagaju FC kuri Kigali Pelé Stadium warangiye amakipe yombi anganyije igitego 1-1. Igitego cya APR FC cyatsinzwe na kapiteni wayo Cheick Djibril Ouattara ku munota wa 38, kiza kwishyurwa na Potty Masimango Fiston mu minota ya mbere y'igice cya kabiri. #UmunotaNews

🚨 Sena ishidikanya ku mibare y’abaturage bafite amashanyarazi mu Rwanda Komisiyo y’Imari n’Ubukungu mu Inteko Ishinga Anmategeko y’u Rwanda umutwe wa Sena, yagaragaje impungenge ku mibare itangazwa yerekana umubare w’abaturage bagejejweho amashanyarazi mu gihe hari abahawe akomoka ku zuba ariko imirasire itagikora. Ubwo iyi Komisiyo yagenzuraga aho Leta igeze ikwirakwiza amashanyarazi mu gihugu, yatewe impungenge n’aho basanze hari imirasire yahawe abaturage ariko itagikora ku buryo byatumye bashidikanya ku mibare itangazwa n’inzego igaragaza aho guverinoma igeze ikwirakwiza amashyanyarazi mu baturage. Abagize iyi komisiyo bavuze ko inzego zibishinzwe zabagaragarije ko mu gihugu abangana na 86.6% bagezweho n’amashyanyarazi harimo n’abafite imirasire ikora n’idakora, hakurwamo abafite imirasire itagikora bakagera kuri 74.4%. Ibyo bagaragaza nk’impungenge ku makuru atangazwa. ▶️ Soma inkuru irambuye: umunota.com/sena-ishidikanya…

🚨Abakora mu birombe bashyiriweho ubwishingizi buzabagoboka mu bihe by’imvura U Rwanda ruri gushakisha uburyo bwo gushyiraho ubwishingizi bushingiye ku bihe by’ikirere bugamije gufasha abakozi n’ibigo by’ubucukuzi guhangana n’igihombo giterwa n’imvura nyinshi ishobora guhagarika ibikorwa by’ubucukuzi by’amabuye y’agaciro. Ubu bwishingizi buzwi nka ‘parametric insurance’, bukorera ku bipimo by’ikirere byagenwe mbere, aho kuba ngombwa ko uwagize igihombo abanza gutanga ikirego kugira ngo harebwe ingano y’ibyo yatakaje. Imibare igaragaza ko urwego rw’ubucukuzi rutanga akazi ku bantu barenga 92.000. Imvura nyinshi cyangwa imyuzure bishobora gutuma ibikorwa by’ahacukurwa amabuye y’agaciro bihagarara ndetse n’amafaranga abakozi binjizaga agahagarara. ▶️ Soma inkuru irambuye: umunota.com/abakora-mu-birom…

🚨 Kaminuza y’u Rwanda mu nzira yo kubaka hoteli y’inyenyeri eshanu i Huye Ubuyobozi bwa Kaminuza y’u Rwanda bwemeje ko bateganya kubaka hoteli nshya mu Mujyi wa Huye, izunganira izisanzwe mu kurushaho kongera ishoramari mu kwakira abantu, by’umwihariko ku ruhande rwa Kaminuza yakira abarimu n’abashakashatsi baturutse hirya no hino ku isi. ▶️ Soma inkuru irambuye: umunota.com/kaminuza-yu-rwan…