حقیقت تو کچھ ایسی ہی ہے !

مرد روتے نہیں۔۔۔ تکلیف ہوتی ہے، درد ہوتا ہے، پر روتے نہیں۔۔۔۔۔ میرے بچے، میرے شہزادے، تمہیں یاد رکھنا ہے یہ ایک دن یہ تمہارے جو نازک سے کندھے ہیں نا ان پہ جانے کتنے ہی منوں بوجھ پڑ جائے گا۔۔۔ کیونکہ تم مرد ہو۔ اس پہ شکوے کا حق بھی نہ رہ جائے گا، لاکھ دکھ ہوں تمہارے، وہ دنیا کی نظروں میں ہوتے نہیں۔۔۔۔ مرد روتے نہیں۔۔۔۔ مرد بنتا نہیں، مرد ہوتا ہے بس۔۔۔۔۔ تم بھی انسان ہو، اس کو سمجھو اب بس۔ سر جھکانا نہیں، گھر میں گھستے ہوئے، گو کہ قتلِ انا روز ہوتا رہے۔ چاہے دل کے پھپھولے ہوں رستے ہوئے، تم کو رونا نہیں۔۔۔ تم کو رونا نہیں۔۔۔۔ تم کو حق ہی نہ ہوگا کہ بابت تمہاری کبھی سوچ لو۔۔۔ گھر کی، کنبے کی جتنی امیدیں ہیں، تم ان کو پورا کرو، تم وقار و متانت کا پیکر بنو، بس نہ شکوہ کرو، بیل جیسے کہ کولہو میں جوتا گیا، تم بھی جوتے گئے۔۔۔۔تم بھی گھومے چلو، اور گھومو بھی ایسے کہ سب کو لگے کتنا خوش ہے یہاں، مرد ہو تم۔۔۔ لہٰذا تمہیں کوئی غم ہی کہاں، تم سے منسوب ہیں سب ہی جور و ستم، لاکھ دھوتے رہو، پھر بھی ہوں گے ناکام، اور صفائی کا حق بھی نہ مل پائے گا، کیونکہ تم مرد ہو۔۔۔۔ مرد ظالم ہے، غاصب ہے، عفریت ہے۔۔۔۔سب گناہیں اسی کے، یہی ریت ہے۔ بس یہ طے ہو چکا۔۔۔۔ طے ہوا ہے کہ مردانگی ہے گناہ، اس گناہ کی سزا اور کفارے بھرو، ہم ادا کر چلے تم بھی کرتے چلو۔۔ یاد رکھنا، میرے شہزادے، کہ جب تم بڑے ہو گئے، تم کو الفت، محبت یہاں ایک قیمت کے بدلے ہی مل پائیں گی، کیونکہ جذبے گو جتنے بھی انمول ہوں، جو کہ کتوں کو بھی مفت مل جائیں گے، تم خریدو گے بس۔۔۔۔ کل جہاں کی ملامت تمہارے ہی سر، کچھ بھی کر لو، رہے گی یہ لغتِ پدر، جس کی وجہ تم مرد پیدا ہوئے۔۔۔۔ بس نبھاؤ اسے، کھوکھلی مسکراہٹ بھی قائم رہے، مسکراہٹ بھی وہ جو ملمع ہے بس، اس کو کھوتے نہیں۔ لاکھ دکھ ہوں تمہارے۔۔۔ وہ دنیا کی نظروں میں ہوتے نہیں۔۔۔ مرد روتے نہیں !

مجھے ایسا لطف عطا کیا کہ جو ہجر تھا نہ وصال تھا مرے موسموں کے مزاج داں تجھے میرا کتنا خیال تھا کسی اور چہرے کو دیکھ کر تری شکل ذہن میں آ گئی ترا نام لے کے ملا اسے میرے حافظے کا یہ حال تھا کبھی موسموں کے سراب میں کبھی بام و در کے عذاب میں وہاں عمر ہم نے گزار دی جہاں سانس لینا محال تھا کبھی تو نے غور نہیں کیا کہ یہ لوگ کیسے اجڑ گئے کوئی میرؔ جیسا گرفتہ دل تیرے سامنے کی مثال تھا ترے بعد کوئی نہیں ملا جو یہ حال دیکھ کے پوچھتا مجھے کس کی آگ جلا گئی مرے دل کو کس کا ملال تھا